يوميات فتاة جزائرية .. {باللهجة الجزائرية}

[فـتاة الدعوة]

السلام عليكم ورحمة الله تعالى وبركاته

غاليتي رأيت هذه اليوميات وأعجبتني كثيييرا فأردت أن أنقلهـآ لكنّ علّهـآ تعجبكن أيضـًا .. وهي باللهجة الجزآئرية .. فإن كآنت هنالِك كلمة غآمضة .. سأترجمها لكن بإذن الله ..

سأََضعُ لكن الحلقة الأولى ..

السلام عليكم اخواتي
الإسم: فتاة جزائرية
اللقب: ملتزمة دينيا
التخصص: قارية بيولوجيا
الأصدقاء: كامل الناس
الشخصية: غريبة الأطوار لكن طيبة

هذي بعض مواصفاتي العادية وإليكم يومياتي الغير عادية أرجو ان تنال إعجابكم
قبل الجامعة كنت وحدة طايشة كل حاجة عندي نقضيها غدوة حتى الباك كنت باغية نجيبو برك باش نفرح بابا وأما وكي يقولولي واش راكي باغية تخرجي في المستقبل نقولهم خلو المستقبل للمستقبل
نهار لي جبت الباك فرحت بزاف وبيناتنا والله حتى بكيت

راكم عارفين فرحة الباك ماتتنساش تكون بزاااااااااااف حلوة
بصح من بعد ياخواتي بدا التعب تع الصح كنت دايما نقول كون غير نجيب الباك ونريح نهار لي جبت الباك لقيت روحي هذا وين بدا التعب الحقيقي خرجي ورق حطي ورق ادفعي ورق و bien sur راكم تعرفوا الإدارات تاوعنا
واكثر حاجة تعبتني هي إختيار الشعبة لي باغية نقراها سقسيت كامل الغاشي لي قاريين ولي ماشي قاريين خاطر ماكنتش دايرة حتى هدف ولا مشروع في راسي وكل واحد بدا يرايي على حساب فهامتو لي يقلي ديري طبيبة باش تداويني باطل ولي يقلي ديري شيخة راهم يخلصو مليح وانا في تالي درت غير رايي انا خيرت واش خيرت ودفعت هذيك الورقة وقعدت نستنى انا وزهري.
كي خرجت résultat عطاولي بيولوجيا انا قريب مت من الخلعة surtout كي قالولي القرايا كامل بال français وانا كنت نص نص فيها
المهم رضيت بالأمر الواقع و رحت باش نسجل في هذيك البيولوجيا على سعدي وراح معايا بابا خاطر مانعرفش مليح الجامعة وهذوك البروتوكولات تع التسجيلات خاطيني كي دخلت من الباب تع الجامعة مانيش عارفة وعلاه جا في بالي هذا الدعاء ( يارب ادخلني مدخل صدق واخرجني مخرج صدق)
رحنا لوين يسجلوا وتماك بابا قرا بلي عطاولي شعبة العلوم الزراعية والبيولوجية راسو حبس وحسب درت تخصص زراعة وقعد في نص الحرم الجامعي يزقي عليا ويقلي وعلاه درتي زراعة وانتي واش راح تديري بيها انا قلتيلي بيولوجي ماشي زراعة لوكان كامل ما جيتش معاك حكمتو على جيهة وبديت نفهم فيه بالعقل بلي هذي الكلية لي رح نقرا فيها تتكون من زوج شعب وحدة تع العلوم الزراعية والثانية تع البيولوجيا وفي الأخير كامل اقتنع و قالي روحي سجلي راهم قريب يغلقوا ويروحو يفطرو
وسجلنا في الجامعة والحمد لله فريناها على خير

كي دخلت للجامعة صراولي بزااااف حوايج بصح ماشي اليوم رح نقلكم عليهم نخلوهم لغدوة ان شاء الله
ايلا اعجبتكم يومياتي قولولي باش نكملهالكم وايلا لالا تان قولولي باش نكملهالكم


يالله اترككنّ في رعاية الله وصلوا على رسول الله صلى الله عليه وسلم

[¦¦» كَنْزُ الدَّعْوَةِ •●]

الأول فهمت بس بعد اشوي ما فهمت أي شيء

أحسن لو تكتبينها بالفصحى

عموما بارك الله فيكِ

[رآغبہ آلفردوس★!]

حتـى أنـا
بـِل فصحـي احسسن

[زخات المطر]

هههههههه


لا انا فمتها ولله اللهجه تجنن

تراها تقولكم اذا اعجبتكم بتكمل واذا لا مارح تكمل<<<< احلى صرت اعرف اترجم

نعم غاليتي اكملي اعجبتني كثيراا

انتظرك

[§غزة§]

عجبتني بزااااااف يومياتها و مادا بيا لوكان تكملي لنا القصة

[نبض الإيمان]

يمممه كلامكم صعب مرره اقول ربي يبارك فيج اكتبيها بالفصحى لو ما عليج امر

[§غزة§]

السلام عليكم ...ترجمة الموضوع اذا ما في مانع من قبل صاحبة الموضوع
السلام عليكم اخواتي
الإسم: فتاة جزائرية
اللقب: ملتزمة دينيا
التخصص: درست بيولوجيا(علم الأحياء)
الأصدقاء: كل الناس
الشخصية: غريبة الأطوار لكن طيبة

هذه بعض مواصفاتي العادية وإليكم يومياتي الغير عادية أرجو ان تنال إعجابكم
قبل الجامعة كنت فتاة طائشة كل حاجة عندي أقضيها غدا حتى الباكالوريا كنت أريد النجاح فيه فقط لأفرح بابا و ماما و حتى عندما يسألونني عما أريد أن أكون عليه في المستقبل أقول لهم المستقبل للمستقبل
في اليوم الذي نجحت فيه بالباكالوريا فرحت كثيرا وبيني و بينكم بكيت فرحا
أنتم تعرفون فرحة الباكالوريا لا تنتسى وتكون جميلة جدا
لكن بعد ذلك بدأ التعب الحقيقي كنت دائما أقول لو أني أنجح في الباكالوريا وكفى .أما عندما نجحت وجدت نفسي أمام مواجهة التعب الحقيقي تجهيز الأوراق الخاصة بالتسجيل و دفعها والانتظار..الخ.. وطبعا أنتم تعرفون اداراتنا
واكثر شئ أتعبني هي إختيار الشعبة التي أريد دراستها سألت كل الناس الذين درسوا وحتى الذين لم لأني لم أضع أي هدف ولا مشروع في رأسي وكل شخص بدأ ينصحني على حسب معرفته الذي يقول لي كوني طبيبة حتى تعالجيني بالمجان والذي يقول لي كوني مدرسة لأن راتبهم زاد و انا في الأخير اخترت ما أريده أنا ودفعت أوراق التسجيل و انتظرت حظي.
لما ظهرت النتائج وجهوني بيولوجيا كدت أموت من الصجمة خاصة لما قالوا لي أن الدراسة تكون بالفرنسية وانا كنت نص نص فيها
المهم رضيت بالأمر الواقع و ذهبت لأسجل في البيولوجيا وذهب معي أبي لأني لا أعرف الجامعة ولا بروتوكولات تسجيلات. ولما دخلت الحرم الجامعي لا أعرف كيف ولماذا تبادر الى ذهني هذا الدعاء ( يارب ادخلني مدخل صدق واخرجني مخرج صدق)
ذهبنا الى مصلحة التسجيلات وهناك قرأ أبي أنهم وجهوني الى شعبة العلوم الزراعية والبيولوجية انصدم وظن أني سأدرس تخصص زراعة وجاء في وسط الحرم الجامعي يصرخ علي و يلومني لماذا اخترت الزراعة و ماذا تفعلين بها..قلت لي بيولوجيا وليس زراعة يا ليتني لم آت معك .أخذت أبي على جنب و فسرت له أن هذه الكلية تنقسم الى جزئين شعبةالعلوم الزراعية والثانية شعبة البيولوجيا وفي الأخير اقتنع و قال لي اذهبي سجلي سوف يغلقون للذهاب للغداء.
وسجلنا في الجامعة والحمد لله تمت على خير

لما دخلت للجامعة حدثت لي أمور كثيرة لكن ليس اليوم سأخبركم بها غدا .اذا اعجبتكم يومياتي قولوا لي حتى أكملهالكم واذا لا قولوا لي حتى أكملهالكم .

[فـتاة الدعوة]

السلام عليكم ورحمة الله تعالى وبركاته ..
باركَ الله فيكم غالياتي على الرد والمرور ..
وبالنسبة للغاليات اللي مافهموا لهجتنا .. هذه فرصة عشان تتعلموها .. والأخت §غزة§ تكرمت بالترجمة بارك الله فيييهااا .. ولكن لن نترجم دائما بعد الآن حلقة أو حلقتين .. رح تفهمو بإذن الله .. وتصير بس كلمات .. رح نترجمها لوحدها بعد هيك ..

رح أحط الحلقة الثانية .. بإذن الله ~

[فـتاة الدعوة]

الحلقة الثانية ..

السلام عليكم
غدا الدخول الجامعي مازلت كيما الذراري الصغار نبغي النهار اللول تع القرايا حددت و وجدت كسوتي لي رح نلبسها غدوة.

الليلة جداتي راهي بايتة عندنا يسمى ماكالاه n'rigule reveil باش نوض بكري هي أكيد رح تتكفل بالأمر
جداتي كانت مقلقة وقتاش نروح نقرى في الجامعة اكثر مني غير دقت 6.30 لقيتها عند راسي واختكم بالسيف باش رقدت ليل كامل وانا نخمم كيفاش رح تكون القراية كيفاش رح يكونو لي بروف ولوكان ماشي ريحة القهوة والمغيز اللي شميتهم يطيبو ماشكيتش نوض من بلاصتي .

المهم نضت توضيت وصليت واتهجت فورا للكوزينة لقيت ماما متكفلة بالحالة من بعد ماشربت قهوتي رحت لبست وستيكيت روحي كيما يلزم راني جامعية ضروك لازم نتهلى في العميرة وبيناتنا لايمت شوية دراهم من الناس لي زعما بوركولي بيهم على الباك و شريتهم كامل لبسة وحاشاكم سبابط وخيرت باش ندخل أول يوم بلبسة كامل بيضة قلت انا تكون فال خير عليا
جدة غير شافتني قالتلي والله تقول طبيبة زعما باش تطلعلي المورال ولا مانعرف (هي اصلا لازم تعلق)
بصح كي خرجت من الدار شفت بلي بزاف ناس يبغو يعلقو لي يقول إنا لله وإنا اليه راجعون ولي يقول تقول fraijidair ولي يقول machine a lavi وعند الدخلة تع الجامعة لقيتلك زوج من فلسطين الشقيقة عرفتهم من لهجتهم ونظن حتى ناس الشرق الأوسط يبغو التعليق قالك ( تقول ملاك ونازل من السما) اووووف فرق كبير بين فريجيدار وملاك
دخلت département تاعنا وتماك لقيت بزاف بنات كنت نعرفهم في الليسي الغاشي كامل دارو بيولوجي امالة ماعندي مانخاف قلك إذا عمت خفت ولي فرحت بزاف كي تلاقيتها هي صحبتي وبنت جيرانا فتيحة لقيتها تم تقول عليها عندها عشر سنين وهي تقرا في الجامعة زعما توري للغاشي وين جاي l'amphi لي نقراو فيه وكامل وحتى هي وماسكلتش من تعليقها غير شافتني بدات تقولي حمامتي بيضة !!!!.


بدات الساعة اللولة دخلنا للمدرج وحكمنا انا وفتيحة البلاصة اللولة مازلنا حاكمين السيستام تع الليسي قلت انا هاكة باش الشيوخا يولو يعرفوني ويعقلو عليا مين يشوفوني دايما قاعدة في وجوههم وغير دخل الشيخ سكتو كامل التلاميذ اه قصدي الطلاب وبدا هذاك الprof يقدم في روحو وفي الموديل تاعو واحكم انت لي تحكم مافهمت من هدرتو غير je m'appel ساسي de عنابة والباقي قلت كي نخرج نسقسي فتيحة بالاك تكون قبضت خير مني المهم من بعد ماحكا كاااااااامل واش حكا قالنا ايا السلام عليكم الدروس يبداو نهار الثلاثاء إن شاء الله هذي bien sur فهمتها خاطر قالها بالعربية


كان هذا هو الشيخ الوحيد لي جا اليوم استنينا شوية وكي ما جا حتى واحد لينا خرجنا انا وفتيحة وبدينا نكتشفو في الأجواء ماكنت عارفة حتى حاجة تم لي نشوفها تخلعني مرة على مرة نلقاو وحدة كنا نعرفوها من الليسي فوتنا نهارنا تم وكلي ماكنتش باغية نرجع للدار من كثر لي عجبتني الحالة
كي رجعت للدار لقيت جدة واما يستناو فيا باش نحكيلهم واش درت وانا بلا ماتوصو حكيت على كلش وبالتفصيل بالطبع ماعدا التعليقات لي سمعتها في الطريق

هكة فات اليوم اللول ومزال الباقي استناوه في الأيام القليلة الجاية إن شاء الله
ايا السلام عليكم وصلى اللهم وسلم على سيدنا محمد

[§غزة§]

بارك الله فيك ختي و راني نستنى في الأجزاء القادمة و سمحيلي على الترجمة ما ديتش رايك في اللول.