[معاني ~]

بسم الله الرحمن الرحيم..



في البداية اسمحولي أن أتكلّم بـ (العامّيه) لعل ذلك يلامس شِغاف القلوب..
.
.
أخي/أختي ..

والله لولا حبّي لقلوبكم الطيبة ماكتبت هالكلام ..

تخيّل إن القيامة حلّت وصحيفتك بين يديك ,, يعني راح تقرى كل حرف نطقت به في
دنياك.. (مافي أحد يعترض على هذا الكلام)! لكن اسمعـ /ي .. هالمرّة جد ..!!

صحيفتك الخاصّه بك ..محّد يشاركك !! لك لحالك .. مافيه حد يقراها لك ..انت لحالك راح تقراها ..

إيش راح تقرى ؟؟؟ سؤال غبي أدري !! لكن ... المرّه هذي جد !!!!!!!!!!!!!! جد !!!!!!!!!!!

يسرّك تقرى.. (واعذروني إذا تلفّظت بشي خارج نطاق الأدب والذوق):


ــــــــــــــــــــــــــــــــــــــــــــــــ
أسألك بالله !! يسرّك تقرى :

(فيه ريال يركض ليه..صدقة جاريه)>>هاذي نكته قلتاها عند الربع وكلهم ماتو ضحك..
ـــــــــــــــــــــــــــــــــــــــــــــــ
يسرّك تقرين:
(الله .. حلو عليك البنطلون .. طالعة فيه قمر)<< بنت خالك أوّل مرّه تلبس بنطلون وانتي شحنتي همّتها في فعل المنكر!
ـــــــــــــــــــــــــــــــــــــــــــــ
يسرّك تقرى:
(ياحليلك والله إنك صحيّح..يخي وسّع صدرك ولاتقعد تعقّد نفسك)>>تكلّم واحد من أخوياك ودّه يتوب..
ــــــــــــــــــــــــــــــ
يسرّك تقرين:
(يع .. كل يوم رز .. وش ذي العيشه!)<< قلتيها لأمّك وهي قاعدة تسوّي الغداء(رز)..
ـــــــــــــــــــــــــــــــــــــــــــــ
يسرّك تقرى:
(******0505) >> ترقّم بنت ..
ـــــــــــــــــــــــــــــــــــــــــــــ
يسرّك تقرين:
(والله مالي خلق ..راح أتصفّح النت )<< أهلك يشاورونك تروحين معهم صلاة التراويح في المسجد وقلتي هالكلام..
ـــــــــــــــــــــــــــــــــــــــــــــ
يسرّك تقرى:
(نعم ..وش تبين خلصيني ترا ماني فاضي لك!!)>> انت مع الرّبع ميّت ضحك ودقّت عليك أمّك وردّيته هالرد ..
ـــــــــــــــــــــــــــــــــــــــــــــ
يسرّك تقرين:
(بنات لايفوتكم .. طالعو شعر ذيك البنت اللي عند المقصف..تموتون ضحك)<<تكلمين الشلّه اللي في المدرسه اثناء الفسحة..
ـــــــــــــــــــــــــــــــــــــــــــــ
يسرّك تقرى:
(الغثيث)>> لقب أبوك في جوّالك..
ـــــــــــــــــــــــــــــــــــــــــــــ
يسرّك تقرين:
(أقوووووووول..الناس تطوّروا وانتي تقولين عباية اسلاميّة!) << دخلتو محل عبايات وامّك تقول للي يبيع .. عطنا عبايه اسلاميّه .. وانتي فصختي الحياء وقلتي هالكلام..
ـــــــــــــــــــــــــــــــــــــــــــــ
يسرّك تقرى:
(أقول ضف وجهك الله يعطيك)>> تكلّم طفل متسوّل عند الاشارة ..
ـــــــــــــــــــــــــــــــــــــــــــــ
يسرّك تقرين:
(وع..مصدّقه نفسها لابسه أخضر..مايناسب بشرتها أبد.الله لايبلانا)<< تكلمين بنت عمّك عن وحده شفتيها في الزواج..
ـــــــــــــــــــــــــــــــــــــــــــــ
يسرّك تقرى:
(يخي تبيني اشتريلك متر قماش.. صدقة..ههههههه)>> تكلّم ملتزم مقصّر ثوبه وانت ميّت ضحك عليه..!
ـــــــــــــــــــــــــــــــــــــــــــــ
يسرّك تقرين:
(عزّ الله رحنا في نومه)<< تكلمين بنات الفصل لأن معلّمة الدين عليكم ..
ـــــــــــــــــــــــــــــــــــــــــــــ

يسرّك تقرين:
(أقول لايكثر..كل شي بيحرّمونه ذولي )<< قلتيها لأنّك سمعتي عن حرمة التشقير..
ـــــــــــــــــــــــــــــــــــــــــــــ

يسرّك تقرين:
(أقول غيرو القناة ..حطّي شي يوسّع الصدر)<< قلتيها لأن أختك مرّت على قناة تتكلّم عن الموت..
ـــــــــــــــــــــــــــــــــــــــــــــ
يسرّك تقرين:
(أقول أقظبي أرضك ولاتقعدين تفشلينّا)<< تكلمين بنت عمّك لأن ودّها تنصح وحده في المنتزة لابسه عبايه ع الكتف..
ـــــــــــــــــــــــــــــــــــــــــــــ
يسرّك تقرى:
(يوووووووه ياربّيه !أف خلاص والله ماأقوم ضفّي وجهك)>> قلته هالكلمة لأمّك وهي تقوّمك لصلاة الفجر..
ـــــــــــــــــــــــــــــــــــــــــــــ
يسرّك تقرين:
(شغلوا هالشريط اللي معي توّه نازل والله إنّه رهيب وفلّه)<< نصيحة أسديتيها لبنات يدوّرن على شريط أغاني علشان يطربون عليه..
ـــــــــــــــــــــــــــــــــــــــــــــ
يسرّك تقرين:
(إذا كانو بيحطّون "أورق" رحت وإذا كان مافيه جلست في البيت أزين!)<< قرارك في روحة زواج بنت جيرانكم
ـــــــــــــــــــــــــــــــــــــــــــ
يسرّك تقرين:
(يختي يهبّل هالممثّل أموت فيه ..أتحدّاك تدورين على فلم مثّل فيه ولاشفته)<< توصفين لصديقتك عن مدى اعجابك بممثّل كافر..
ـــــــــــــــــــــــــــــــــــــــــــــ
يسرك تقرى:
(يع ...لايفوتك الهيئه جتنا ..يخي والله ماأواطن هالانسان)>> تكلّم خويّك في عزيمه عن واحد ملتزم دخل عليكم..
ـــــــــــــــــــــــــــــــــــــــــــــ
يسرّك تقرين:
(عمى في عينك!! الله ياخذك يالدلخة ماتشوفين!! كسّرتِ مواعينّا)<< تكلمين الشغاله لأنّها كسرت بيالة..
ـــــــــــــــــــــــــــــــــــــــــــــ
يسرك تقرى:
(a+f= .....) << منحوته على طاولتك في المدرسه أو الجامعة ..
ـــــــــــــــــــــــــــــــــــــــ
يسرّك تقرين:
(ياربّيه .. أقولّك ماشتهيت شي ..أف انتي ماتفهمين!)<< أمّك 5 مرّات تناديك ع العشاء لأنك ماكلتي شي من الصبح وانتي ردّيتي عليها هذا الرد..
ـــــــــــــــــــــــــــــــــــــــــــــ
يسرّك تقرين:
(هلا باللي لاشفته .. فز قلبي من مكانه!)<< كلمات وجهتيها لعضو دخل الشات ..
ـــــــــــــــــــــــــــــــــــــــــــــ
يسرّك تقرى:
(لو يزيد الشووق جمــرهـ تحولني رمـــاد ,,,لو يزيد العــشـــق شعـــرهـ تحولني للجنوون ..)<< توبيكك في المسن ..
ـــــــــــــــــــــــــــــــ
يسرّك تقرين:
(أحس شكلي غلط من راسي لرجولي!)>> قلتيها وانتي تطالعين نفسك في المرايه..
ـــــــــــــــــــــــــــــــــــــــــــــ
يسرّك تقرى :
(بسرعة لحّد يشوفنا)<< قلتاها لصديقك وانتوا قاعدين تدخنون ورا المدرسه..
ـــــــــــــــــــــــــــــــــــــــــــــ
يسرّك تقرين:
(حلوة بلوزتك بس بيجي عليها البنطلون روعة)>> قلتيها لبنت خالتك لانها لابسه بلوزة على تنّورة.. لكن شكل التنوره معها ماعجبك !!
ـــــــــــــــــــــــــــــــــــــــــــــ

يسرّك تقرين:
(ياكرهي لهالاستاذه..ماأدانيها في عيشة ربّي!)<< تصفين مشاعرك لصديقتك تجاه أحد معلّماتك..!
ـــــــــــــــــــــــــــــــــــــــــــــ
يسرّك تقرى :
( ماأحب أصادق هالأشكال)<< ترد على صديقك وهو يسألك عن علاقتك بولد جيرانكم اللي على قدّهم ..
ــــــــــــــــــــــــــــــــــ
يسرك تقرين:
(جميع إصدارات المغنّي المبدع ******* لاتفوتكم)>> موضوع تعبتي عليه في منتداكم..
ــــــــــــــــــــــــــــــــــــــــ
يسرّك تقرى:
(ماراح أروح لهم ..مالي نفس..أحس بالطفش إذا دخلت بيتهم)<< أهلك راح يزورون عمّك ويبونك تروح معاهم ..
ـــــــــــــــــــــــــــــــــــــــــ
يسرّك تقرين:
(هلاليه ودمّي أزرق)<< لقبك في المنتدى ..
ــــــــــــــــــــــــــــــــــــ
يسرّك تقرى:
(آخر خبر ..فضيحة الممثّلة ***** )<< رسالة بريد رسلتاها لكل الموجودين عندك..
ــــــــــــــــــــــــــــ
.
.

أدري إن بعض هالكلام فيه وقاحة لكن هاذي بعض الكلمات اللي تطلع من بعض الناس(لاجعلني الله وإياكم منهم) وللأسف اقتبستها من كلام المجتمع اللي نعيش فيه..

أخوي..أختي..

أنا ماأمزح !! .. ترا راح تقرى كل صغيرة وكبيرة نطقت بها في حياتك ..قال جل جلاله ((مايلفظ من قول إلا لديه رقيب عتيد)) ..

ياليت تسمعون هالمقطع من كل قلبكم ..


http://www.up-king.com/almaciat/iybq...qrus8hikag.mp3

أرجوكم أحبّتي ..( لاتطلقوا العنان لألسنتكم )

لذلك .. انتبهوا لنفسكم.. وامسكوا لسانكم في سواليفكم عند الناس أو في المسن أو في المنتديات و في ردودكم أو في التلفون...................الخ

وخلّوا كلامكم طيّب علشان يسرّكم تقرونه يوم القيامة..

ردد معي.. (اللهم اغفرلي ماقدّمت وماأخّرت وماأسررت وماأعلنت وماأنت أعلم به منّي أنت المقدّم وأنت المؤخّر لاإله إلا أنت..)
ولاتنسون كفّارة المجلس إذا طلعتو من أي مكان ..

اللهم هل بلّغت اللهم فاشهد ..بيجي يوم تتذكّرون كلامي ..((فستذكرون ماأقول لكم))

ياليت تنشرون هالرساله المهمّة بين أحبابكم اللي تخافون عليهم ع البريد الالكتروني..وان شاء الله ماراح يفوتكم الأجر ^__^


الكاتبة .. أخت معاني ^^